Nagaland: Longleng district-ah hmeichhe police station dah thar

Nagaland-a Longleng-ah Inrinni khan hmeichhe police station hawn a ni a, Ngangshimakok Sangtam DIGP (Range) Mokokchung chuan station thar hi a hawng.

Hmeichhe police station hawnnaah hian SP bakah Deputy Commissioner leh NGO hruaitu eng emaw zat an tel a ni.

Ngangshimakok chuan Longleng chu a lawmpui thu sawiin Longleng police-te tan chuan red letter day a nih thu a sawi a, distrct mipuite tan pawh ni chhinchhiah tlak tak a nih thu a sawi. Hmeichhia ten a hranpaa police station an neih bik chuan hmeichhia leh naupangte laka pawikhawihna thleng ṭhin chhuina kawngah langtlang zawka thil kalpui theih a nih phah dawn tih a sawi.

Officer leh staff te chu hmeichhiate buaina chinfelna kawnga chak zawka hma la turin a chah bawk a ni.

Senior Superintendent of Police (SSP) Longleng, Yangba Konyak pawhin thu sawiin hmeichhia te tana a hranpaa police station siam chuan hmei­chhia leh naupangte tan rorelna dik leh inthliarhranna tel loa hmalak a ti awlsam dawn tih a sawi.

Inrinni vek khan Wokha Police Station bulah Women Police Station (WPS) dang hawn a ni bawk niin DIPR report chuan a tarlang.

Wokha WPS pawh hian a hrangin hmeichhia leh naupangte laka pawikhawihna thubuaite chu an chhuiin an bawhzui dawn a ni.