Meghalaya: Dadenggre-a cheng ten district ngiat

Meghalaya-a West Garo Hills-a Dadenggre Civil Sub Division-a chengte chuan Inrinni khan Phulbari-a Shyam­nagar thingtlang khuaah district ngiatin meeting an nei.

Inrinni-a meeting an neih hi district hran ngiata general meeting an neih vawi­khatna a ni a, GSU Phulbari unit presi­dent Francewell Marak leh Rupa M Marak-te chuan meeting hi an kaihruai a ni.

Rupa chuan Dedenggre aia sub divison naupang pahnih Ampati leh Resubelpara-te chuan district nihna an nei daih tawh tih sawiin anni pawh hian 1999 aṭang daih tawh khan distrcict hi an ngiat tawh tih a sawi. General meeting pawh vawi eng emaw zat an la neih chhunzawm dawn tih sawiin an thil ngiat chu an ngiat chhunzawm zel dawn tih a sawi. Rupa chuan an thil ngiat chu thil dik tak a nih thu leh an dikna chanvo a nih thu a sawi a, sorkar pawhin a ngaihthlaksak ngei a beisei thu a sawi.

Inrinni-a general meeting an neihah hian NGI hruaitu eng emaw zat bakah senior citizen te leh tualchung mi eng emaw zat an tel a ni. Rupa chuan a ṭul a nih chuan nawrh pawh an huaihawt dawn niin a sawi bawk.

FKJGP Phulbair president, Ranuel Sangma chuan district hran nei tura an inpeih tawh thu sawiin an duhna tihpuitlin anih hma chu an bei zel dawn tih a sawi a ni.