Journalist man duhloh lantir nan ‘The Imphal Times’ in editorial page dahawl

Manipur-a English chan­chinbu hriat hlawh tak ‘The Imphal Times’ chuan kar hmasaa journalist Kishore­chandra Wangkhem man a nih vanga lungawi lohna lantir nan Inrinni khan an editorial page an dah awl.

Kishorechandra Wangkhem Facebook-a video post-ah BJP kaihhruai state sorkar leh RSS-te chu a sawisel a, hemi avang hian November 27 khan National Security Act (NSA) hnuaiah an man.

Wangkhem hian Chief Minister N Biren Singh chu Modi leh Hindutva puppet tiin a sawi a, Rani of Jhansi piancham puala program an buatsaih avangin state sorkar chu a dem thu sawiin Rani of Jhansi hian Manipur zalenna atan engmah tih a nei lo tiin video-ah hian a sawi a ni. He video hi nasa takin a darh zui a ni.

Imphal Free Press chuan Wang­khem-a advocate Chong­tham Victor thusawi tarlangin video-a Wangkhem-a thusawi te hi sorkar pawisawinaah a ngaih theih loh tih sawiin sorkar program chungchanga a mimal ngaihdan a sawina mai niin a sawi. Engtin nge society chawhbuaina a nih theih? tiin zawhna a zawt zui bawk.

Hetih lai hian CM Biren Singh chuan TNIE hnenah Wangkhem hi journalist a ni lo niin a sawi ve thung.

CM Singh chuan Wangkhem hi journalist a ni tawh lo tia sawiin, a thawhna Information Service TV Network chuan November 19 khan a ban tawh niin a sawi. October thla pawh khan a awmdan mawi loh avngin man a lo ni tawh tih sawiin khami ṭum kha chuan journalist association ten chhuah tura an ngen avanga chhuah leh a nih thu a sawi a ni. Association chuan amah ngeiin ngaihdam a dil dawn niin sawi mah se vawikhat mah a rawn inlan lo a ni, a ti. Video-ah khan a thusawi loh puia sawiah a puh nia sawi bawkin thil a tisual ngei niin a sawi bawk a ni.