AP-a thingtlang khaw 24 kalpawhna siam dawn

Arunachal Pradesh-a Lower Siang district-a thingtlang khaw 24 chu kawngpui kalpawhna siamsak a ni dawn niin hemi kawnga hmala tu pawl te chuan Thawhṭanni khan an sawi.

Kawngpui kalpawh tir tura hma an lak khaw 24-ah hian mi 4000 vel an cheng nia sawi a ni.

Kawngpui siam tura hma latu pawl ‘No Road No Vote Central Committee’ (NRNCC) chuan ruahmanna an siamsak khua te hi Kangku biala awm te an nih thu an sawi a, heng khua te hian an state ṭhenawm Assam kawngpui chu an chak lakna leh hmundanga kal nan an hmang ṭhin tih an sawi.

NRNCC coordinator Mikjom Taso chuan Likabali aṭanga Kangku bial thleng kalpawhna tur kawngpui km 64-a thui siamna tur chu Pradhan Mantri Gramin Sadak Yojana (PMGSY) hnuaiah state Rural Works department chuan an pek dawn thu a sawi a, hei hi tualchhung mite leh NRNVC-te hmalakna vang a nih thu a sawi a ni.

Sorkar official-te chuan kawngpui siam hna hi an ṭan thuai dawn thu an sawi ve bawk.

Likabali Assembly constituen­cy-a December 2017-a inthlan ṭhat a awm ṭum khan henglai biala polling station pakuaah chuan vote pakhatmah a tla lo a, henglai bial mipuite hian “No road no vote” thupuia hmangin inthlan hi an lo boycott tawh a ni.

Inthlan boycott-te hian civil disobedience movement kalpui tumin sorkar an nawr a, an id card-te sorkar hnena pek letah an vau hnuah Chief Minister Pema Khandu chuan an harsatna te chinfelsak a tiam a, an nawrh tum an ṭhulh phah ta bawk.

Mikjom Taso chuan kawng­pui siam tur chu Kangku bila mipuite tan chuan an duhthusam tihpuitlinna tur a nih thu sawiin state bakah sorkar laipui hmalakna chu lawmawm a tih thu a sawi. Kawngpui an neih chuan an bial tan khawvar duhawm tak a ni dawn tih a sawi a ni.