Meghalaya-ah Dan loa thing zaina hmun ruk khar

Meghalayas-a Garo Hills-ah Thawhṭanni khan Forest department official, district thuneitute leh police ṭangkawp te chuan District Level Special Task Force Committee (DLSTFC) kaihhruaina hnuaiah dan loa thingzai ṭhin an dap thut a, thingzaina hmun paruk an khar.

Heng thingzaina hmun an khar te hi Bhaitbari aṭanga Chibinang area inkar ami te an ni a, West Garo Hills huamchhunga mi te an ni.

Chibinang area hi dan loa thingzai hralh rukna hmunpui a ni a, thudawnna ṭhenkhatah chuan dan loa thingzaina siam 40 vel a awm nia tarlan a ni a, heng thingzaina zawng zawng te hi Assam ramri depa awm vek an nih thu tarlan a ni. Mahse Thawhṭanni-a beihpui thlakah hi chuan paruk chiah hi an la manchhuak thei thung.

GHADC Forest Check gate awm reng tho mah se chhun engah pawh a rukin truck hmangin thingzai hi an hralh ru reng tho niin an sawi.

Joint team ten beihpui an thlak hi zing dar 9 aṭanga chawhnu dar 2 thleng a ni a, dan loa thingzaina hmuna bungrua an hmuh ang ang te chu an man vek a ni.

Forest official chuan hmun ruk an dap thu sawiin Haribhanga, Bholarbhita, Katmil leh Ghumaijhora hmunte chu an dap thu a sawi a, thingzai tam tak bakah thingzaina khawl tam tak hmun tinah hian man tur a awm tih a sawi. Beihpui an thlak tur thu chu puanzar lawk a ni lo tih sawiin an ṭhawng thut tih a sawi a, tualchhung mi ṭhenkhatin an pui bawk niin a sawi.

DFO Sachin Gavade chuan kum nga kaltaa beihpui an thlak ṭum kha chuan tualchhung miten an puih loh thu sawiin tunah chuan ṭhalai eng emaw zatin an pui tih a sawi a, hei hian ṭhalai te chu environment humhimna kawngah an harh thar tih a entir niin a sawi bawk.