AP-ah sipaiten tualchhung mi 2 an kap

Arunchal Pradesh-a Tirap district-a Chasa khuaah kar liamta Zirtawpni zan khan sipaiten tualchhung

mi pahnih, Nokphya Wangdan (28) leh Ramwang Wangsu (23)-te chu luia an sangha man zo an haw lam an kap hliam. Sipaite chuan hriatsual palh vang niin an sawi a, mahse he thil thleng vang hian sipaite demna a nasa leh hle.

Sipai kah hliamte hi Dibrugarh-a Assam Medical College and Hospital (AMCH)-ah enkawl mek an ni. Hliam tuar pakhat hi a kutah kahfuh niin, pakhat hi a keah kahfuh a ni thung. AMCH superintendent Dr Prasanta Dihingia chuan an pahnih hian ngaihtuahawm an ni lo tih a sawi.

He thil thleng chungchangah sipaite chuan hel chetla an awm thu information rintlak an dawng a, hei vang hian special force-te chuan an lo chang tih an sawi a, tualchhung mi an lo kap chu hriatsual palh a ni tih an sawi.

Nagaland, Manipur, Assam leh Arunachal Pradesh-a Naga zirlai pawl lian ber, Naga Students' Federation (NSF) chuan he thil thleng hi an dem thu leh, pawikhawihtute chu na taka hrem a, hmarchhak biala Naga chenna bialah Armed Forces (Special Powers Act), 1958 (AFSPA ) titawp vek turin an phut nghal bawk.

Nikum December thla khan Nagaland-a Mon district-ah sipaiten civil mi 14 an lo kaphlum tawh bawk a, hei pawh hi inhriatsual vang niin an sawi. Hei vang hian hmun hrang hrangah lungawi lohna lantirin, AFPA hlip tura nawrna pawh a nasa zui hle.

Tripra district BJP president Kamrang Tesia chuan sipaite chuan tualchhung mite venhimna pek kaiin, thil hrechiang tak tak loa an chetna avang chuan nunna chan an awm phah ta zawk a ni tiin, an kah hliamte pahnih chu fahrah ve ve an ni a, sorkar pawhin an dinhmun a ngaihtuahpui a ngai a ni, a ti.

March 21 khan Tirap district headquarters, Khonsa aṭanga km 30 vela hla, Old Kolagoan khuaah sipaiten hel laka beihpui thlak an neihnaah NSCN-IM hel nia an sawi mi pahnih an lo kaphlum tawh bawk a, mahse a hnuah NSCN chuan sipaite kahhlum zinga pakhat chu an mi leh sa niin, pakhat zawk erawh civil mi a nih thu an sawi.