Manipur-in Irom Sharmila chawimawi dawn

Sorkar laipuiin hmarchhak state-a sipai thuneihna sang pekna, Armed Forces Special Powers Act (AFSPA) a titlem hnuah, Manipur sorkar chuan kum 16 chhung zet AFSPA hlih phuta chaw ngheia nawrh huaihawttu, 'Iron Lady' Irom Sharmila chu chaiwmawina hlan a tum.

Chief minister N Biren Singh chuan Sharmila chu chawimawina hlan ngei an tum thu sawiin, "Manipur mipuite hmalakna ka fak a, a bikin kum 16 chhung AFSPA duh lohna leh hlih phuta chaw nghei nawrh huaihawttu Sharmila hi ka fak a ni," a ti.

Kum 49 mi, Manipur human rights activist hriat hlawh tak, Irom Chanu Sharmila hian AFSPA hlih putin kum 2000, November 4 aṭanga kum 2016, August thleng kha chaw ngheiin nawrh a huaihawt a, kum 2017 Manipur assembly inthlan dawn khan People's Resurgence and Justice Alliance a din a ni. Mahse politics lamah erawh a hlawhtling zui ta lem lo a ni.

Sharmila chuan sorkar laipuiin AFSPA puanna hmun a titlem chu lawmawm a tih thu a sawi a, hemi rual hian he dan sawisel hlawh tak hi hmarchhak pum aṭangin sut vek tawh se a duh thu a sawi nghal bawk. He dan hmansual avanga nunna chan chhungte leh, he dan avanga harsatna tawkte chu zangnadawmna pek ngei a phut thu a sawi bawk.