Assam : Tea Garden Area-a Model High School din tharte kal ṭan dawn

Assam chief minister Himanta Biswa Sarma chuan tea garden area-a model high school din thar 97 leh state chhung hmun danga model high school 13-te chuan May 10 aṭangin an kal ṭan tawh dawn tih a sawi.

Chief Minister chuan India ramin zalenna a hmuh aṭanga kum 75-naah, Assam-a tea garden area-ah high school din a ni ve ta a ni, a ti. Sarma chuan, "State chhungah tea garden 800 vel a awm a, mahse heng hmunah elementary level thleng chauh school a awm a ni. Tunah chuan high school-te an awm tawh dawn a ni," a ti.

State sorkar chuan tea garden-ah hian model high school 119 din a tum a, heng zinga 97-te hi peihfel tawh niin, academic session 2022-23 aṭangin an kal ṭan tawh dawn a ni. A bak model high school 22 pawh nakkum lamah hawn theih tura peih tum a ni bawk. Model high school-te hi higher secondary school-ah la upgrate leh a tum bawk. Sorkar chuan heng school hrang hrangah zirlaite chu mid-day meal bakah breakfast thlengin pek tel a tum bawk.