Tripura sorkarin ṭhalai hna neilote pung awm loin loan pe dawn

Tripura sorkar chuan an state-a ṭhalai, hna neilote tan eizawnna kawng an dapna turin ‘Start-Up Tripura’ scheme hnuaiah a pung awm loin loan a pe dawn.

Chief minister Biplab Kumar Deb hoa council of ministers meeting-ah he thutlukna hi siam a ni tih information and cultural affairs minister Sushanta Chowdhury chuan a sawi. Hei bakah hian fund managing company-te pawhin eizawnna an dapna turin ṭhalai hna neilote tan loan hi a pe dawn bawk a ni, a ti.

Start-Up Tripura scheme hnuaia loan la turte tan, sorkarah DPR (detailed project report) an thehluh hmasak phawt a ngai dawn a, report hi thuneituten lo enfiahin an lo zirchiang dawn a, hemi hnu hian thutlukna an siam ang. Hei hi thla hnih aṭanga thla li chhunga tihfel hman tum a ni. Chowdhury chuan department lam pawhin loan pek dan turah hian sorkar lam chuan kaihhruaina pawh a buatsaih mek tih a sawi bawk.