Assam CM hlui Tarun Gogoi a thi

Assam chief minister hlui leh Congress hruaitu hlun, Tarun Gogoi chu nimin tlai khan kum 84 mi niin, multi-organ failure vangin Gauhati Medical College Hospital-ah a thi. 

Tarun Gogoi hi November 2 khan damdawi-inah hian dah luh niin, kar liam ta Inrinni tlai lam aṭang khan a dinhmun hi a tlahniam a. Hemi hnu hian thawk lamah harsatna a nei a, Pathianni aṭang khan dialysis tih a ni bawk. 

August thla khan Gogoi hian Covid-19 a kai tih hriat a ni a, GMCH-ah enkawl niin thla hnih dawn enkawl a nih hnuah October 25 khan a chhuak thei chauh a ni. Mahse damdawi-in aṭanga a chhuah hnuah taksa lamah harsatna dang a neih chhoh leh avangin November 2-ah admit leh a ni. Nimin tlai khan a thi ta a ni.

Assam Chief Minister term thum lo chelh tawh, Tarun Gogoi hian kum 50 chuang zet politics khelin, central leh Assam-a Congress sorkarah mi pawimawh tak a lo ni tawh ṭhin. Kum 15 (2001 - 2016) chhung Assam CM niin, state CM ni rei thei ber a ni. 

Kum 1971 khan Parliament member atan thlan tlin niin, Lok Sabha member atan ṭum ruk thlan tlin a ni tawh. Kum 1991-95 khan Narasimha Rao kaihhruai sorkar laipuiah Minister of State (Independent Charge) Ministry of Food and Food Processing Industry a ni tawh bawk.