PM Modi-a'n Assam-a cancer care hospital 7 hawng dawn

Prime minister Narendra Modi chuan tun thla tawp lam, April 28 hian Assam tlawhin Dibrugarh district-ah cancer enkawlna damdawi-in pasarih a hawng dawn.

Assam sorkar leh Tata Trusts-te thawhdunna, Assam Cancer Care Foundation (ACCF) hnuaiah Assam-ah hian cancer care hospital 18 siam tum a ni. A thawh khatnaah cancer care hospital pakua leh Guwahati-ah State Cancer Institute (SCI) siam a ni ang.

April 28-a Prime Minister-in a hawn tur zingah hian Dibrugarh leh Barpeta-a center pahnihte chu Level 2 (L2) niin, Lakhimpur, Jorhat, Darrang, Kokrajhar leh Tezpur amite chu Level 3 (L3) an ni.

Health department chuan Dibrugarh centre-ahhian khum 185 leh Berpeta-ah khum 140 a awm dawn a, L3 centre hoah chuan khum 45 ṭheuh a awm dawn tih a tarlang.

Prime minister-in a tlawh dawn avangin Assam sorkar pawh theihtawpin a inbuatsaih nghal a, Pathianni khan chief minister Himanta Biswa Sarma chuan Khanikar Police Reserve area tlawhin, vantlang inkhawm neihna tur atana remchangte an en nghal a ni. ACCF hnuaia cancer hospital sakte chu a en tawh bawk a, doctor leh construction engineer-te a kawm a ni.