Manipur-ah International film festival nei mek
Manipur-a international film festival vawi khatna, ‘Eikhoigi Imphal International Film Festival (EIIFF)’ chu kar liam ta Inrinni aṭang khan Imphal-ah neihṭan a ni a, April 6 thleng a awh ang.
Manipur State Film Development Society (MSFDS) leh Manipur State Film and Television Institute (MSFTI)-ten an buatsaih, ni nga awh state international film festival hi Manipur Cinema-in kum 50 a tlin lawmna denchhena buatsaih an ni.
Union ministry of information and broadcasting hnuaia Directorate of Film Festivals (DFF) pawhin he film festival buatsaih hi a theih angin a lo thlawp bawk.
Festival hawngtu, filmmaker Aribam Syam Sharma chuan Manipur-in international film festival hmasa ber a buatsaih thei chu lawmawm a tih thu a sawi a, state sorkarin film industry a hlamchhiah chu pawi a tih thu leh, kum dangah pawh hlawhtling taka festival buatsaih chhoh zel a nih theihna turin state sorkarin sum lama puihna a siam pawh a ṭul a tih thu a sawi.
Ni nga chhung festivel buatsaihnaahhian feature film 11, non-feature film pariat leh short film pakhat chhuah a ni ang. Film tihchhuah tur zingah hian Iran, Germany, Philippines, Norway, Ukraine leh South Korea film-te pawh an tel a ni.