Tripura : IPFT hotu thar Mevar Kumar Jamatia

Tripura-a BJP kaihhruai ṭangrual sorkara fisheries and tribal welfare minister Mevar Kumar Jamatia chu Pathianni khan an party, IPFT (Indigenous People’s Front of Tripura) hotu atan lungrual taka thlan a ni.

Jamatia hian NC Debbarma a thlak dawn a ni. Debbarma a kum a upa tawhin, a hrisel ṭha tawh lo hle a, nikum pawh khan damdawi-inah pawh luhpui a ni fo a ni.

Pathiannia Agartala-a Dasarathdeb Smriti Bhavan-a IPFT Central Committee meeting-ah party hruaitu thar hi an thlang a, party hotu lu ber tur bakah general secretary atan Dhananjoy Tripura leh MLA nilai Prasanta Debbarma-te thlan an ni bawk.

Meeting zawha news conference a neihah Jamatia chuan a chunga rinna an nghat ngam avangin lawmthu a sawi a, an party chuan hun harsa tak an tawk a, an dinhmun pawh tunah tak chuan a ṭha lutuk lo a, mahse hruaitu thar chak tak takte an intuaithar leh dawn tih a sawi.

An party-in hun rei tak aṭanga state hran an lo phut chungchang pawh sawilangin, Jamatia chuan state sorkarah BJP nen thawkdun mah se, an thuthlung erawh a in ang lo a, a ṭul hunah thutlukna pawh a hrana an siamte a ngai tih a sawi. State leilung faten harsatna hrang hrang an tawrh mek chinfelna ṭha ber tur chu state hran din nia an la ngaih reng thu a sawi bawk a ni.