AAPSU-in Inthlan hun sawn an phut

All Arunachal Pradesh Students Union (AAPSU) chuan state election commission (SEC)  hnenah December 22-a Panchayat leh Municipal inthlan buatsaih tum chu sawn turin an phut. 

AAPSU president Hawa Bagang chuan SEC chu Covid-19 hri leng mek avangin inthlan buatsaih a tum chungchanga Health department ngaihdan chu ngai pawimawh tura an duh thu a sawi. "Health department hian state chhunga hripui leng mek avangin inthlan hi thlasik reh hnuah buatsaih an duh thu pawh an sawi a ni. Tuna inthlan lo buatsaih chu a hlauhthawnawm niin an ngai," a ti. 

SEC-in inthlan kaltlangpui a tum chungchang chu zawtin, AAPSU Presi­dent chuan commission hian inthlan buatsaihna tura kaihhruaina siamte chu a zawm lo tih a sawi bawk. Electoral roll hman mek chungchangah thuchhuah siam a awm lo a, voter list-a belh leh tur paih tur chungchangah hearing neih a ni bawk lo sawii, electoral roll 2020 draft pawh tihchhuah a ni lo, a ti. 

Confederation of Service Asso­ciation of Arunachal Pradesh (CoSAAP)  chuan state sorkar hnenah muni­cipal leh panchayat inthlan neih turah Class 10 leh 12 zirtirtute duty tir tawh lo turin a ngen. 

State chief secretary hnenah ngenna an thehluhah, confederation chuan hripui leng vanga hun rei tak chhung zirna chhunzawm thei loa an awm hnuah, November 16 aṭang khan class kal ṭan leh theih chauh a ni tih an sawi. 

Board examination hmachhawn tur, Class 10 leh 12 zirtirtute chu inthlana duty tura koh pen leh an nih chuan naupang zirlai thlengin a tuar thei dawn a ni, an ti. 

Arunachal Pradesh-ah hian Zilla Parishad 25 awmin, Zilla Parishad constituency 241 a awm a ni. 

Gram Panchayats 2,215 awmin constitutency 8,436 a awm a, municipal body pahnih, ward 20 awmna Itangar Municipal Corporation leh ward pariat awmna Pasighat Municipality a awm bawk.