Manipur ran thihna: Scientist ten mihring tih a nih ring

Manipur-a ran vulh lai mak tak taka an thihdan chhuichiangtu Wildlife expert-te chuan ramsa mak danglam tih a nih an rin loh thu sawiin mihring thiltih a nih an rin thu an sawi.

Hetihlai hian ran vulh te hi eng vanga thi nge an nih leh engin nge tihlum tih erawh an la hre thei bik lo a, ramsa mak tak hmu nia insawi an awm bawk avangin hrilhfiahna an la nei bik lo thung.

Ran vulh te mak tak taka an thih ṭhin avang hian Wildlife Institute of India (WII) team te chu state chhungah hian chah luh an ni a, WII team te hi Imphal-ah inkulhin thil thlen dan hi an chhuichiang a ni.

Ran vulh mak taka maia an thihna hmasa ber nia sawi chu October 27 daih tawh khan a ni a, Churachandpur district-a Chiengkawnpang thingtlang khuaah niin ar leh varak tam tak chu mak takin an thi a ni.

Veterinary department offi­cial-te chuan Churachand­pur-a ransa mak taka taka an thihdan hi an chhuichianna report an thehluh hmasakah chuan ramsa ha hriam tak neiin a khawih nia a lan thu an thehlut. Hetihlai hian Wildlife Institute of India scientist-te chuan ran vulh lai thah a nih dan aṭang hian mihring thiltih a nih theih thu an sawi a, sehna hnuhma a awm loh bakah an taksa hi fai taka kalsan ṭhin a nih avangin ramsa tih a ni lo thei niin an sawi.

Kangpokpi district-a bawng thah a nih leh bawng ki lakbonaah phei chuan ramsa a inrawlh lo niin an sawi bawk.

Mahse chief conservator of forest (CCF) Anurag Vajpayee chuan Churachandpur leh Kang­pokpi-a ran vulh thi ṭhenkhat chu police ten an zirchiang dawn tih a sawi. CCF chuan WII expert team, Dehradun mi te chu Imphal-ah inkulhin state forest department te nen ṭangkawpin camera thang an kam nual tih a sawi.

WII Wildlife forensic expert-te chuan sihal a inrawlh maithei niin an sawi bawk a, nikum lam pawh khan hetiang chiah hi Odisha-ah a thlen tawh thu a sawi. Mahse Vajpayee chuan Manipur-ah sihal hmuh tur an awm ngai loh thu a sawi ve thung.

WII hian an chhuichianna report hi nimin khan tihchhuah an tum a, mahse he thuziah lai thleng hi chuan an la tichhuak lo a ni.