Tripura-a buaina chhuaka hliam tuar thih belh

Tripura sorkarin Kanchan­pur sub-division huam chhunga a hlawma Bru raltlante dah­khawm a tumna duh loa Joint Movement Committee-in nawrh a huaihawt ṭuma security force-te nena an intihbuai ṭuma hliam tuar pakhat chu a thih belh a, buaina chhuak vanga thi hi pahnih an awm ta a ni. 

Inrinni liam ta khan Panisa­gar-a nawrh huaihawtte nen an innawr buai avangin police-te chuan silai hmetpuakin, pungkhawm zinga pakhat Srikanta Das chu silai muin a fuh a, damdawi-ina kalpui a nih hnuin a hliam tuar loin a thi a ni. Nizan khan an intihbuainaa hliam tuar, fire sevice-a thawk Biswajit Debbarma chu a thi leh a ni. He buaina chhuakah hian mi 24 in hliam an tuar a, hliam tuar zingah hian police mi leh sa eng emaw zat an tel. 

Buaina chhuak vang hian Asam Rifles leh CRPF sipai eng emaw zat chu Kanchanpur hmunah tirh luh an ni. 

Chief minister Biplab Kumar Deb leh deputy chief minister Jishnu Dev Verma-te chu nimin khan Delhi-ah kalin, BJP national president JP Nadda an hmu dawn. Bru raltlante avanga buaina chhuak chungchangte an sawipui ang. 

Joint Movement Committee chuan tiam chin awm loa nawrh an  huaihawt hi a la chhunzawm zel a ni.