UNC-in AFSPA sût vek turin phut

Manipur-a Naga pawl lian ber, United Naga Council (UNC) chuan sorkar laipuiin Manipur-a valley area aṭang chauha Armed Forces (Special Powers) Act 1958 (AFSPA) a hlih chhan zawtin, hmun danga he dan hman meknaah pawh hlip vek turin an phut.

Thuchhuah siamin, UNC chuan state sorkarin thlei bik a neihzia chu khawvel hmuhah pholan a ni leh ta tih a sawi. "He dan hlip tur hian sorkar laipui chauhin thuneihna nei mah se, state sorkarin rawtna a siam angin a kalpui a ni. Valley area-ah chauh AFSPA chu hlih a ni a, hilly area erawh he dan hnuaiha hian dah chhunzawmin, mipuite chuan security force-te inlulinna chu an la tuar chhunzawm zel a ni," tiin UNC information and publicity secretary, SK Stephen chuan thuchhuah an siamah hian a tarlang.

Kum 1997 aṭanga sorkar laipui leh Naga helpawl, NSCN-ten Manipur hill area-a inkahhai an puan tawh hnuah leh, Kuki Chin Group nen Suspension of Operation an ziah hnuah pawh hill area aṭanga AFSPA hlih a nih ve loh chhan chu sawifiah turin sorkar laipui an phut bawk.

AFSPA hlip vek tur chuan hun a duh deuh ang : Nagaland CM
Nagaland chief minister Neiphiu Rio chuan AFSPA hlip vek tur chuan hun ala duh deuh dawn niin a sawi a, hemi rual hian state chhung hmun ṭhenkhata AFSPA hlih chu 'enchhinna' a ni tih a sawi nghal bawk.

Thawhṭannia tribal hoho leh civil society organisation aiawhte nena AFSPA chung­changa consulative meeting an neihah CM Rio chuan a sawi a ni. Dan sawisel hlawh tak, AFSPA sut vek a nih theihna atana state chhunga boruak ṭha leh muanawm a awm theihna tura thawhpui turin state mipuite chu a sawm nghal bawk a ni. Hemi rual hian state chhung boruak a ṭhat loh a, dan leh thupek-te kenkawh theih loha an awm palh anih chuan AFSPA hi hman leh a ni leh thei a ni, a ti.

Rio chuan nikum December thlaa Mon district-a security force-ten civil mi 14 an kahhlum chungchangah, he thil thleng chhui tura state sorkarin a ruat, member 22 awmna Special Investigation Team (SIT) chuan premilinary report a thehlut tawh a, final report a thehluh a, case siam anih hunah mipuite hriat tura puanzar a ni ang, a ti. Sorkar laipui pawhin Mon district-a thil thleng chhui tur hian SIT a din bawk a, anni pawhin report an thehlut tawh bawk niin CM chuan a sawi.

Meeting-ah hian chief secretary J Alam pawhin thu sawiin, kum 30 dawn hnuah Nagaland hmun ṭhenkhat aṭangin AFSPA hlih a ni ta tiin, hmasawnna dang pawh an hmuh chhoh zel a beisei thu a sawi. Home commissioner Abhijit Sinha chuan an state police station 15 huam chhungah AFSPA hi hlih a ni tih a sawi bawk.

Sorkar laipui chuan April 1 aṭanga hman ṭan turin hmarchhak state pathum - Assam, Manipur leh Nagaland-a AFSPA hmanna bial chu a titlem a, mahse he dan hi sut vek erawh a la ni lo.