Manipur health insurance scheme-a hamṭhatna tipung

Manipur chief minister N Biren Singh chuan free health insurance scheme, Chif Ministergi Hakshelgi Tengbang (CMHT) hnuaia a thlawna damdawi-ina inenkawl theihna chin bithliah, chhungkaw khat tana Rs nuai 2 ni ṭhin chu Rs nuai 5-ah tihpun a nih thu a puang.

Chief Minister secretariat-a press briefing a neihah CM chuan hei hi sawiin, kum li kalta chhunga CMHT hlawhtlinna hrang hrang, mi rethei leh dinhmun chhe zawkten an chhawr ṭangkai dante an thlir ho hnuah, a thlawna inenkawl theihna tur sum bithliah chu tihsan an rel tih a sawi.

Health for all scheme hi thingtlang khaw 300 chuang a tuam tawh tih sawiin, state chhunga thingtlang khaw zawng zawng tuamchhuah vek tum a ni tih CM chuan a sawi. CMHT hnuaiah hian beneficiary nuai 5.24 chuang awmin, an zinga 83,000 chuangin damdawi-ina a thlawna inenkawlna hi an dawng tawh tih a sawi bawk.