Tripura-ah firfiak pawl nena inzawma puh mi 3 man

Tripura police leh central intelligence agency thawkdun chuan Sepahijala district-a Jatrapur khuaah Bangladesh firfiak pawl, Jamaat-Ul-Mujahideen (JMB) nena inzawmna neia puh mi pathum an man a, Thawhṭanni khan an pathum hian April 7 thleng judicial custody-ah dah an ni.

Police official chuan thu an dawn bawhzuiin, central intelligence agency leh Tripura police joint team chuan Jatrapur khuaa Khayokhola area an dap a, mi pathum - Imran Hossain, 24, Abul Kasem, 32 leh Hamid Ami, 24-te chu an man tih a sawi. Sub-divisional judicial magistrate court-ah kalpui nghal an ni a, Unlawful Activities Prevention Act (UAPA) hnuaiah India sorkar laka indo kalpui tuma puhna thubuai siamsak an nih thu a sawi bawk.

Police-te chuan March thlaa JMB firfiak pahnih mante thu an zawhfiahnaah Hossain hming hi an sawirik thu leh, a hnuah a thurualpui mi pahnihte hming pawh hi hriat a nih thu an sawi.