Shillong khawpui traffic tawt tihziaawmna turin Meghalaya sorkarin school bus project a kalpui dawn

Meghalaya home minister Lahkmen Rymbui chuan state khawpui, Shillong-a traffic tawt tihziawmna turin sorkar chuan school bus project kalpui a tum tih a sawi.

Rymbui chuan project bus kalpuina tur hian department chuan hmabak hautak tak nei dawn mah se theihtawp chhuah an tum tih a sawi. Khawpui chhunga zirlaite tan mini bus 100 tlan tir an tum dawn tih a sawi a ni.

"School eng zatin nge nei thei dawn tih ka la hre lo a, mahse he project hi buaipui mek a ni. Zirlaite tana ṭangkai leh ṭha tur ngaihtuah a ni ang," a ti.

Chief minister Conrad K Sangma chuan Assembly-a budget speech a neih khan, sorkarin pool school bus system kalpui a tum thu hi a lo sawi tawh a ni. Hei bakah hian Shillong khawpuiah electric bus tlantir tum a ni bawk a,khawpui chhunga chetvelna awlsam zawk siamna tura hmalakna atan hian sorkar chuan Rs vbc 20 a sanction tih a sawi bawk.

SSA teacher-te hlawh tur pe chhuak
Education minister ni bawk, Lahkmen Rymbui chuan state chhunga hun eng maw chen hlawh la thei loa awm tawh, SSA teacher-te hlawh atan sorkar chuan cheng vaibelchhe 60 a pe chhuak tawh tih a sawi bawk.

Media mite a kawmnaah, Rymbui chuan March 29 khan sorkar chuan Rs vbc 60 hi pe chhuakin, hei hi SSA teacher-te thla hnih hlawh pek tur a daih dawn tih sawiin, district hrang hrangah semchhuah a ni tawh a ni, a ti. Hei bakah hian an hlawh tang la awmte pekna turin sorkar laipui chuan Rs vbc 68 a pekchhuah thuai an beisei thu a sawi.

Meghalaya-ah hian SSA teacher hi 12,541 an awm a, thla nga chhung hlawh an la thei tawh lo a ni.