Sikkim-ah sorkar hnathawk ṭha lote dahna tur department siam dawn

Sikkim chief minister Prem Singh Golay chuan an state-a sorkar hnathawk, an hna thawk ṭha lote puala department hran siam dan tur ngaihtuah a ni tih sawiin, hnathawk ṭha lo te chunga a lawm loh thu a tilang leh.

CM Golay hian a hma pawhin sorkar hnathawk inthlahdahte chungah a lawm loh thu hi a lo sawichhuak tawh a ni. Kum 2021 khan official, office-a hnathawk tura kal tlai ṭhinte enfiah hna kalpui a ni tawh a, office kal tlaite chu showcause notice pek an ni ṭhin. Hei vang hian officer-te pawhin hun eng emaw chen chu office kal hunbi an vawng ṭha hle a, mahse a inthlahdah chho leh tawh a ni.

Sorkar official-te chu an hna ṭha taka thawk turin CM chuan Gangtok-a Samman Bhawan-a hun a hmanah a chah leh a ni. "Department hrang siam dan tur kan ngaihtuah a, hetah hian engineer, account officer, additional chief secretary thleng pawhin, officer hnathawk ṭha lo, mipui rawngbawl hna thawhna kawnga harsatna thlentute sawn an ni ang. He department-ah chuan motor pek an ni lo ang a, an hlawh chiah an la ang. Hnathawktu dangten ṭha taka hna an thawh theihna atan an hnathawhna tibahlahtute chu sawn zel an ni dawn a ni," a ti. Cabinet chuan he department hming atan hian, 'Directorate of Coordination' tih pawh a thlang fel tawh a, Home Department hnuaiah a awm dawn a ni, a ti.

Golay chuan sorkar hnathawkte chuan thatchhe vek lo tih sawiin, "Hnathawktu 10 zingah inthlahdah fal hi mi pahnih khat an awm ṭhin a, hei hian midangte hnathawh pawh an tibahlah ṭhin a ni. Ni khata zawhfel tura tih chu zawhfel a ni zel tur a ni. Hetih lai hian officer ṭhenkhat inthlahdah avangin a thla telte buaipui a ngai a, hei hian Sikkim mipuite tan harsatna a thlen a ni. Officer-te chu mipui tana hnathawh tiawlsamtu tur an nih a, harsatna thlentu zawk an ni tur a ni ngai lo," tiin a sawi.