Guwahati-ah door-to-door Covid test an kalpui ṭan

Assam sorkar chuan an state khawpui, Guwahati-ah Covid-19 hri darh zel tur venna kawng khat atana hri darh zualna bial huam chhunga in tin tlawh chhuak a, conoravirus test runpui neih tur chu a kalpui ṭan ta. 

Health minister chuan test runpui neih tur hi a vawi khatna a ni tih sawiin, health department chuan nimin aṭang khan bul ṭanin, Ward No 2 (Pandu area) ah an kalpui ṭan tih a sawi. Ni hnih chhungin he ward chhungah hian sample 3,000 test hman an tum tih a sawi bawk. 

Khawpui chhunga test runpui neihna atan hian Standarh Q Antigen test kit an hmang a ni. Hemi hmang hian result hi minute 20-ah hriat theih nghal zel a ni ang. Guwahati-a hian hri kai an pun chak em avangin mipuia hri darh zel tur venna atan sorkar chuan complete lockdown a lo puang tawh bawk. Test runpui kalpui ṭanna, Pandu area hi sorkarin mipuia hri darh zualna hmunah a lo puang tawh a, he bial huam chhunga hri kai zinga 90% chuang hi pawn lama zin chhuahna nei lo an ni. An bial huam chhunga cheng zinga 38% chuan hri hi an kai tawh nia sawi a ni. 

Health secretary Samir Sinha chuan Pandu area hi major hotspot a nih avangin bul ṭanna atan hman a ni tih sawiin, hotspot dangah pawh test runpui hi kalpui a ni dawn tih a sawi. Assam-ah hian sample nuai 4.71 test a ni tawh a, rapid antigen test hman hma hian RT-PCR leh TrueNat hmangin test tam zawk chu neih a lo ni tawh a ni. Kar liam ta khan Guwahati medical college-a micro-biology department hotu leh a deputy bakah Covid testing lab-a thawk, technician 10-te chuan hri hi an kai tih hmuh chhuah a ni a, hei vang hian laboratory pawh hi Thawhṭanni thleng khan khar a ni. Nimin khan team thlaktu turte hi Jorhat aṭangin an thleng a, lab pawh an hawng zui leh nghal bawk.