Assam-Meghalaya border talk thawh 2-na June-July-ah neih leh tum

Assam chief minister Himanta Biswa Sarma chuan Assam-Meghalaya-in ramri chungchanga buaina an neihna hmun 12 zinga hmun parukah inremna siam a nih hnuah, a bak hmun dang paruka inremna siam leh tumin June-July ah inbiakna neih leh tum a ni, a ti.

Chief Minister Sarma chuan an hmabak,heng hmun paruka inremna siam chu thil awlsam tak a ni dawn lo tih a sawi nghal bawk.

State pahnihte hian kum 50 chhung zet ramri chungchanga buaina an neihna hmun 12 zinga hmun parukah hian tun hnaiah inremna siamin, union home minister Amit Shah hriatpuinain Chief Minister pahnihten inremna hi an ziak a ni.

Sarma chuan buaina an la neihna hmun dang paruk zingah hian Langpih, Block I leh II te a tel avangin heng biala inremna siam tum chu a hautak chho dawn hle tih a sawi a, mahse theihtawp an chhuah dawn a, June-July velah inbiakna an ṭan theih a beisei thu a sawi.

Inremna an siam tawhna, border area hmun parukah Survey of India chuan hna an thawk ṭan tawh tih sawiin, Memorandum of Understanding (MoU)-a an ziah angin border pillar-te an siam dawn a, inremna an lo siamte chu tihfel a ni tawh dawn a ni, a ti.

Ramria inremna an siam danah ramri hrula cheng, state pahniha mite an lungawi lo nia sawi chungchang pawh sawilangin, Sarma chuan eng inremnaah pawh mi zawng zawng an lungawi kim thei lo tih a sawi.

March thlaa Assam leh Meghalaya-in inremna an siamna, border area hmun paruk khan sq km 36.79-a zau a huam a, Assam lamin sq km 18.46 changin Meghalaya lamin sq km 18.33 an chang a ni.