Manipur Minister-in Meiningsinliu a hmu

Manipur minister Th Biswajit Singh chuan Nilaini khan a chenna inah tunhnaia social media lama a thlalak darh nasa tak, hmeichhe naupang kum 10 mi Meiningsinliu leh a chhungte a hmu.

Tamenglong district-a Dailung Primary School-a pawl 1 zirlai, Meiningsinliu hi a nu leh pate hnathawka an chhuah a ngaih avanga a nau, kum 4 mi a pawm mu chunga school-a lehkha a zirlai thlalak chu tunhnaiah a darh nasa hle. Hei vang hian minister pawhin an chanchin hi ngaihvenin a bepawp nghal a, Nilaini khan a chenna ina Meiningsinliu, a nau leh a nute hi hmuin; Meiningsinliu lehkha zirna tur a ngaihtuahsak tur thu leh, Imphal-a boarding school-a a luh tir thu a lo hrilh a ni.

Rongmei Naga Students’ Organisation, Manipur (RNSOM) hruaitute pawhin Meiningsinliu nu leh pate hi hmuin, an fanu lehkha zirna an ngaihtuahpui tur thu pawh an lo hrilh tawh bawk.