Manipur : Sorkar parking rule duh lohna lantirin Paona Bazar khar

Manipur-a Imphal West-a Paona Bazar huamchhunga dawrkaite chuan sorkarin parking rule a siam duh lohna lantirin Nilaini aṭang khan tiam chin awm loin dawr an khar.

Market area-a traffic tawt tihziawmna turin Thawhlehni khan sorkar chuan thuchhuah a siam a, bazar area-ah motor eng chi mah park phal a ni lo a, dawr neitute ngei pawh an dawr kawtah motor an dah phalsak an ni lo a, Naga Nullah hmuna dah vek tura tih an ni.

Dawrkaite sorkarin an dawr kawtah an motor park phalsak an ni lo chu an hrethiam tih an sawi a, mahse anmahni dawrtu, customer-te motor dah phalsak an ni tel lo chu an duh lo tih an sawi. Minute reilote chhung pawh customer-te motor park phalsak an nih lo chu an sumdawnna thlengin a tuar phah dawn niin an sawi a ni.

Chief minister N Biren Singh chuan kawngsira parking area ni lo, kawngpui sira motor park ṭhin chu tihtawp tumin ṭan an la dawn tih a sawi a, mipuite pawh sorkar hmalakna thlawp a, kawngsira an motor dah mai ṭhin lo turin a lo ngen tawh bawk.