Nagaland :Peren QC-a awmte dan zawm ṭha loah puh

Nagaland state-ah coronavirus hri kai an pun belh zel a, Peren district chu hri kai hmuh tamna ber niin positive rate hi 13%  a tling. Hetih lai hian state puma positive rate erawh chu 3% aiin a hniam thung. 

High Powered Committee (HPC) thupuangtu Mmhonlumo Kikon chuan Peren district-a hri kai an pun belh chakna chhan hi state dang aṭanga haw, khung hran mekten quarantine dante an zawm ṭhat tawk loh vang niin a sawi. Hemi rual hian hri hi mipuiah a la darh lo tih a sawi a, hri kai hmuhte chu quarantine centre-a awm mek leh, hri kaite enkawl hna thawktu frontline worker ṭhenkhat an ni tih a sawi. 

Kikon chuan hri darh zel tur venna atana pawimawh chu quarantine centre-a awm mekten dan an zawm ṭhat te leh mitinte an fimkhur a ngaih thu a sawi. Frontline worker-te pawh sorkarin kaihhruaina a siamte zawm ṭha tura hriattir an ni bawk. Nagaland-a hri  kai hmuh chhuah tawh hi mi 625 an tling tawh a, an zinga 243 chu enkawl dam an ni tawh a ni. Recovery rate hi 36% a ni.