Assam-a chhiatna thlenga thi mi 62 tling tawh

Assam-a tuilian leh leimin vanga thi chu mi 62 an tling tawh. Hetih lai hian tuilian hian ziaawm lam a pan ṭan tawh thung. 

Assam State Disaster Management Authority (ASDMA) chuan tulian vanga thi mi 38 an tling tawh a, ruahsur nasain leimin a thlen avanga thi mi 24 an awm tawh bawk tih a tarlang. Tuilian tuarte awmna tura siam, relief camp 75-ah mi 4,226 an khawsa mek a ni. Sorkar chuan tuilian tuarte ṭanpuina atan hian Thawhṭanni thleng khan buhfai quintal 1,058.82, dal quintal 194.71, chi quintal 58.40 leh mustard oil quintal 121.41 a semchhuak tawh a ni. 

Barpeta district chu tuilian tuar nasa ber niin, an district-a thingtlang khaw 182 chu tuilian hian a chim a, mi nuai 2.5 chuangin harsatna an tawk a ni.  National Disaster Response Force, Assam State Disaster Response Force leh tualchhung thuneitute chuan tuilian tuarte chhanchhuah leh chhawmdawl hna hi an thawk a ni.