Assam Panchayat inthlanah vote 75% tla

Assam Panchayat inthlan thawh hnihna chu Pathianni khan zawhfel a ni ta a, state election commission chuan vote hi 75% vel a tla nia an chhut thu sawiin hei hi a la danglam leh thei tih an sawi.

Inthlan thawh hnihna hi district 10-ah neih niin ral­muang taka inthlanna hi neih a nih thu an sawi bawk.

Assam State Election Commissioner H N Bora chuan polling sttaion 900 velah chuan zan rei tak thleng vote thlak tur hian an intlar tih a sawi a, Cachar, Karimganj leh Nalbari district-ah te chuan complaint a awm thu sawiin, hmun dangah erawh inthlanna hi ralmuang takin an zo tih a sawi.

Cachar leh Karimganj-a polling station pariat ve ve-ah leh Nalbari-a polling station pakhatah chuan vawiin hian inthlan ṭhat neih a ngai dawn tih Bora chuan a sawi a ni.

Bora chuan vote hi 75% vel a tlak thu sawiin vote tlak ṭhatna ber chu Dhubri-ah niin 86% a tla tih a sawi bawk. Official-te chuan report an dawnkim hunah chuan vote thlak zat pawh hi an la pung dawn tih a sawi.

Pathianni khan Nalbari, Barpeta, Bongaigaon, Dhubri, South Salmara, Goalpara, Cachar, Hailakandi, Karimganj leh Hojai district-ah te inthlan­na hi neih niin naktukah hian vote chhiar a ni ang.

December 5 khan inthlan thawh khatna hi neih niin vote 81.5% a tla thung.

Report chuan chuhtu awm loin candidate 292 an tling tih a tarlang bawk.