Assam tea body in ‘chaiwala’ Modi sawisel

Assam-a tea body lian ber Assam Chah Mazdoor Sangha (ACMS) chuan Pathianni khan Prime Minister Narendra Modi chu na taka sawiselin thingpui huana thawkte chu a ngaihsak tawk lo tih an sawi a, kumin kumtawp hma ngeiin an hlawh atana cheng 350 pek a lo tiamsak tawh pawh chu tihlawhtling turin an ti bawk.

ACMS General Secretary Rupesh Gowala chuan Modi chuan amah leh amah chu “chaiwala” tia a insawi thu sawi­in, hetiang hian sawi mah se ramchhunga thingpui huana thawk mi mak­taduai chuang te laka a thutiam chu kum li chhungin a la tihhlawhtling lo tih a sawi.

2014 Lok Sabha inthlan dawnah khan Modi chuan Assam-ah kawng­zawh vawi eng emaw zat buatsaihin thingpui huana thawk te chu nikhata an hlawh chu a tlem berah cheng 350 a nih dawn thu nasa taka a tlangaupui thu Gowala chuan a sawi.

Brahmaputra lui kam thingpui huana thawk te hian ni khatah cheng 167 an hlawh tlangpui a, Barak lui kama thawk te rawh chuan cheng 145 an hlawh thung.

Assam sorkar leh ACMS bakah thingpui huana thawk pawl dangten wage agreement an siam chu nikum khan a tawp tawh a ni.

Gowala chuan sorkar chuan an hlawh chu cheng 30-a tihsan a nih dawn thu sawiin kumin January 1 aṭang khan hman ṭan tur tih an sawi a, Mahse March 1 aṭang khan hman ṭan a ni leh chauh tih sawiin thingpui huana thawk te chuan thla hnih chhung khan nitin cheng 30 an hloh ziah ang anih thu a sawi bawk.

ACMS general secretary chuan company thingpui huana thawk te chuan nikhatah cheng 167 an hlawh laiin, state sor­kar thingpui huan Assam Tea Company Limited (ATCL) hnuaia thawk mi 26,000-te chuan nikhatah cheng 115 chiah an hlawh tih a sawi a ni.

Assam-ah hian thingpui huan lian tak tak leh lian lutuk lo 800 vel a awm nia sawi a ni a, hetaṭang hian rampuma thingpui tharchhuah 50% chu an tharchhuak pha a ni.