Dima Hasao leh Karbi group-ten Delhi-ah nawrh huaihawt

Dimasa Students’ Union, Karbi Students’ Association leh Karbi Anglong Dima Hasao Autonomous State Demand Committee-te chuan nimin khan Assam-a hill district pathum - Dima Hasao, Karbi Anglong leh West Karbi Anglo huam chin chu autonomous state-a siam phutin Delhi-ah nawrh an huaihawt.

Dimasa Students’ Union’s general secretary Pramith Sengyung chuan Dima Hasao mipuite chuan hun rei tak autonomous state hi an phu tawh tih sawiin, an thil phut nawrna atan movement hrang hrangte pawh an lo kalpui tawh tih a sawi. Mahse tun thlengin sorkar chuan an thil phut hi a ngaihsak duh lo tih a sawi.

Pawl pathumte hian autonomous state din an phutna sorkarin a ngaihven a, hma a lakpui hma chuan theihtawpa nawr zel an tum thu an sawi bawk.

Sengyung chuan Assam aṭanga Meghalaya state siam a nih khan, Karbi Anglong leh Dima Hasao (North Cachar Hills)-a chengte chu an duhna lam thlantir an ni tih a sawi. An thlahtute awmna leh, Assam sorkarin hill district-a a bik taka enkawl a tiam avangin Assam lama awm an thlang a, mahse an intiamna ang chu engmah a thleng ta lo a ni, a ti.

Jantar Mantar-ah chawhma dar 10 aṭanga chawhnu dar 1 thleng nawrh hi huaihawtin, a hnuah an thil phut chungchangah prime minister Narendra Modi hnenah memorandum an thehlut a ni.