Manipur-ah gold bar kg 2 chuang man

Manipur police-te chuan Ningani khan Kakching district-a Pallel check-post ah gold bar eng emaw zat leh a kengtu an man. Gold bar an man hi a vaiin kg 2 chuang a ni.

Chief minister N Biren Singh chuan gold bar man a nih thu hi a Facebook page-ah tarlangin, Kakching police commando unit-ten Imphal-Moreh kawngah, Ningani zing dar 10.30 velah an man tih a sawi. Gold bar hi 18 niin, kg 2.988-a rit a ni a, a kengtu Prakash Kshetri (23) pawh man tel nghal a ni, a ti.

Gold bar an man hi Eeco van kawngkhar vei lam step hnuaiah thukruk an ni. Police-te chuan Khsetri hi khawi aṭangin nge gold bar hi a lakluh a, khawi lam nge panpui a tum tih an zawtfiah mek. Gold bar mante hi Customs department kutah hlan a ni ang.

Tengoupal district police-te chuan ruihhlo, WY tablet kg 2.4 an man bawk a, an ruihhlo man hi international market-ah Rs nuai 49.44 man a ni. He ruihhlo neitu Khen Gensang Zou (32) an man tel bawk. CM chuan an state-a ruihhlo do beihpui thlak mekah chak zawka hna an thawh theihna turin Tengnoupal district police chuan Moreh, Tengoupal leh Machi-ah Narcotic Cell an din thu sawiin, ruihhlo zuar leh tawlhru ṭhinte chu an umzui zel dawn tih a sawi.

Tengnoupal police-te hian 43 Assam Rifles nena thawkdunin, tun hnaiah Morch check-point-ah ruihhlo Rs vbc 1.4 hu an lo man tawh bawk.