Meghalaya-ah hri kai mek 36-ah pung

Meghalaya-ah Covid-19 kai pariat hmuh belh leh an ni a, hri kai mek hi mi 36 ah a pung chho a ni. Hri kai hmuh thar zinga panga hi Border Security Force (BSF) mi an ni a, pakhat hi tunhnaia Guwahati-a inneih lawmnaa kal niin, Tura (West Garo Hills) leh Ri-Bhoi district mi pakhat ve ve an tel bawk. State chhunga BSF sipai zingah hri kai hmuh belh zel an nih avangin, state sorkar chuan thuneitute hnenah sipaite chu test vek turin a nawr. Shillong-ah hian camp pawn lama khawsa, BSF sipai hi 135 vel an awm nia sawi a ni.