ASS-in compulsory subject-a Hindi dah tumna duh lo

Sorkar laipuiin hmarchhak state pariatah, Class 10 thleng compulsory subject-ah Hindi dah a nih tur thu a puan chu Assam-a literary body, Asam Sahitya Sabha (ASS) chuan an duh loh thu an sawi. Sorkar laipui chu tualchhung ṭawng chawilar leh vawnhim lam ngai pawimawh turin a ti.

ASS secretary-general Jadav Chandra Sharma chuan thuchhuah siamin, Hindi hi compulsory subject-ah dah a nih chuan, Assamese leh tualchhung ṭawng dangte chu hun lo kal zel turah an dinhmun a derthawng thei a ni, tiin a sawi. An pawl chuan Assam sorkar chuan CBSE leh English medium school-ah Assamese ṭawng telh tir tura an lo nawr tawh zawk thu leh, tun thlenga awmzia a la neih loh thu a sawi bawk.

April 7-a Parliamentary Official Language Committee, Delhi-a neihah union home minister Amit Shah chuan hmarchhak state pariatten compulsory subject-a Hindi dah an remtih thu hi a sawi a, hmarchhak state-ah hian Hindi teacher 22,000 lak an ni tawh tih a sawi bawk a ni.

Assam-a eptu party, Congress leh AJP pawhin sorkar laipui thupuan hi sawiselin, hmarchhak bial mipuite duhdan a ni lo a, hei vang hian he thutlukna a siam tawh pawh hi sut leh turin an phut.