Assam-in Dubai-ah lamkhuang leh hmarcha thawn

Assam chuan an state-a thar, lamkhuang leh hmarcha, green chilli chu Dubai-ah an thawn chhuak ṭan ta.

Kar liam ta Zirtawpni khan Dhubri deputy commissioner Anbamuthan MP chuan Bilasipara khuaah an thil thawnchhuah tur hi a vailiam a, Lokapriyo Gopinath Bordoloi Airport aṭangin Inrinni khan Dubai lamah thawn chhuah a ni.

Dubai-a an thawn hi lamkhuang ton 1.5 leh green chilli ton 0.5 a ni a, hei hi Lulu Group International kaltlangin supermarket 20 chuangah sem a ni ang. Agricultural and Processed Food Products Export Development Authority (APEDA) chuan an thil thawnchhuahna turah hian a ṭul angin a buaipui tih Anbamuthan chuan a sawi.

DC chuan, "Hei hi Dhubri district chauh ni lo, Assam state puma agro-economics sector tana ni chhinchhiah tlak a ni. District thuneihna leh loneitute hmalakna avangin Dubai-ah Dhubri-a thar lamkhuang leh green chilli kan thawn thei ta," a ti. Hetianga hun remchang an neih theihna chhan chu Guwahati-a AEPDA-in exhibition an buatsaihah, Farmer Producer Organisation (FPO) leh Lulu Group International aiawhte inhmuin inremna hi an siam tih a sawi bawk.