Assam Police officer-te an in lamah battalion mi leh sa an chhawr khap

Assam sorkar chuan police office-te chu an in lamah battalion mi leh sa tumah an chhawr phalsak an ni lo tih a puang.

Chief minister Himanta Biswa Sarma chuan hemi chungchangah hian hriattirna tichhuakin, police officer-te hian a nihna hmangin battalion mi tumah in lamah an chhawr thei lo a, in lam hna thawk tura an chhawrte chu anmahni sum sengin an chhawr tur a ni tih a sawi thu, sorkar thuchhuah chuan a tarlang.

CM Sarma hian state police battalion commandant-te leh superintendent of police (SP)-te hnenah kaihhruaina khauh tak tichhuakin, police officer zingah thuneitu sang lam aṭanga phalna la hmasa loa battalion mi, in lama an hna thawk tura chhawr an awm anih chuan report thehlut nghal turin a ti bawk. Hetianga in lam hna thawk tura chhawr an lo awm a nih chuan, state sorkar ni loin a chhawrtu officer chuan a hlawh a pe tur a ni, tiin CM chuan a sawi.

Sarma chuan personal security officer (PSO) pawh tihtlem zel la tum a nih thu a sawi a, "PSO 4,000 vel awm ṭhin chu 700 vel kan titawp tawh a, tunah hian minister, MLA leh eptu hruaitute tana PSO neih theih zat pawh tihchhuah a ni dawn a, hemi hnu hian PSO hi 700 velin kan tihtlem belh leh thei dawn a ni," a ti. PSO an tihtlem tak hmang hian battalion pahnih siam theih a ni dawn tih a sawi bawk.