AP Governor-in tourism chawilarna tura car rally buatsaih vai liam

Arunachal Pradesh governor Brig. (Dr.) B.D. Mishra (Retd) chuan Pathianni khan hmarchhak biala tourism chawilarna tura buatsaih, North-East India Inter-State Friendship Car Rally 2022 chu Itanagar-ah a vai liam.

Governor chuan rally buatsaihtu, International Friendship Car Rally Association (IFCRA) chungah lawmthu sawiin, he rally hmarchhak bialah rah ṭha tak a chhuah ngei dawn a ni, a ti. Hmarchhak state pariat aṭanga he car rally-a telte chungah lawmthu sawi bawkin, Governor chuan hmarchhak state-te hming aiawh, 'ASTAM-NMM' boruak chu chawisang turin a chah. ASTAM-NMM hi 'Astam Naman' tia lam rik ani a, 'Salute to the great eight' tihna a ni.

IFCRA buatsaih car rally hi North Eastern Council, Ministry of DoNER leh Arunachal Pradesh-a Department of Youth Affairs-ten an sponsor a, hmarchhak state pariat an tuam chhuak ang.