Traffic tawt tihziaawmna tur Silchar bypass zo hnai tawh

Assam sorkarin Silchar khawpuia traffic tawt tihziaawmna tura bypass road a siam chu siam zawh a ni hnai tawh.

Public works department (PWD) official (national highway division) chuan km 22-a thui bypass road siam hi hna 99% vel zawhfel a ni tawh tih a sawi. He kawng siam hian Silchar traffic tawt a tihziaawm phah dawn hle tih a sawi nghal bawk. Bypass hi hawn la ni lo mah se, hun eng emaw chen aṭang khan motor-te chu tlantir an ni tawh a ni.

Bypass road siamna lungphum hi Assam chief minister hlui Tarun Gogoi khan kum 2011-ah a phum tawh a ni. He kawng hian Sonai assembly constituency-a Sonabarighat area pawhin, Silchar khaw chhehvela thingtlang khaw 20 chuang a huam bawk. Kum 2011 khan hna thawh ṭan nghal niin, kum 2014 khan zawh tura ruahman a ni a, mahse court lamah harsatnate a awm avangin tihkhawtlai a ni ta. Hun eng emaw chen hna thawh hi chawlhsan lailawk a nih hnuah kum 2021 khan thawh chhunzawm leh a ni a, zawhfel a ni thuai

tawh dawn.

Cachar district headquarters, Silchar khawpuiah hian Mizoram, Manipur, Meghalaya leh Tripura aṭangin motor-ten an paltlang reng avangin traffic a tawt thei hle a, hei vang hian sorkar chuan khawpui chhunga traffic tawt tihziaawmna turin bypass road hi a siam a ni.