Arunachal district 24-na Lepa Rada

Arunachal Chief Minister Pema Khandu chuan Thawhṭanni khan Lepa Rada chu state chhung district 24-na a nih thu a puang.

Lepa Rada hi Lower Siang district aṭanga lakchhuah niin Tirbin, Dari, Sago leh Basar bial-te chu Lepa Rada district chhungah hian an awm a ni.

Pema Khandu chuan kum 10 kaltaa mipuite duhthusam chu a hlawhtling ta niin a sawi. "Kum 10 kalta vawiin ni ang chiahah khan CM thi ta Dorjee Khandu chuan Lepa Rada mipuite chu district hi a tiam a ni", a ti.

Pema chuan budget session neih leh hunah district thar hmasawnna tur te chu sawiho a nih dawn thu a sawi a, district in a mamawh ang zawng zawng chu pek an ni vek dawn tih a sawi. Sorkar chuan inkalpawhna pawh an siamṭhat dawn thu sawiin horticulture leh agriculture lama theihna an neih te pawh an haichhuahsak dawn tih a sawi bawk.

Pathianni hmasa December 5 khan Shi Yomi chu district-ah puan a lo ni tawh bawk a, a 25-na turin Pakke-Kessang chu East Kameng district aṭanga lakhran niin district-ah puan a la ni dawn bawk a, administrative unit panga a awm dawn a ni.