DD Lapang-an NPP zawm ta

Meghalaya Chief Minister vawi nga lai lo ni tawh DD Lapang chuan Thawhṭanni khan National People’s Party (NPP) a zawm ta.

DD Lapang hian Chief Minister Conrad K Sangma, Deputy Chief Minister Prestone Tynsong, C&RD Minister Sniawbhalang Dhar, NPP State President Dr WR Kharlukhi-te awmlaiin Nongpoh-a Ri-Bhoi district-ah NPP hi a zawm a ni.

CM Conrad Sangma chuan Lapang chu a lo lawm thu sawiin an party tana mi hlu tak a nih dawn thu a sawi a, a tawnhriat tawh leh a thiamna te chu ṭangkai taka an hman dawn thu a sawi. Meghalaya mai bakah hmarchhak kaihruaitu atana mi pawimawh tak a nih dawn thu a sawi bawk.

Conrad Sangma chuan Congress party chu bei zuiin an party hruaitu hlun te hnualsuatah a puh a, Lapang pawh an hnawl thei anih chuan Meghalaya mipuite chu engtin nge an tih ang tiin zawhna a zawt a ni.

Lapang hi Congress hruaitu hlun tak niin September 14 khan Congress party a chhuahsan a, Congress chuan kum upa lam an ngaihsak tawk lo niin a sawi. NPP hi a zawm nghal dawn nia sawi ni mah se a thawm a reh leh deuh a, mahse Thawhṭanni khan NPP hi a zawm ta a ni.