Co-curricular education-ah Nagaland-a school pakhatna
Education Today in zirchianna a neihah Co-curricular education huang chhungah Nagaland-a school pakhat chu India rama ṭah berah a puang.
Kar kaltaa Bengaluru-a India’s School Merit Award 2018 hlanna hun hmannah Dimapur-a school Livingstone Foundation Higher Secondary School (LFHSS) chuan chawimawina hi an hum haw a ni.
Eastern Mirror chuan LFHSS hian kum hmasa lamah pawh khan 13-na a lo nih tawh thu sawiin Nagaland bikah phei chuan school ṭha bera thlanchhuah a lo nih tawh thu an tarlang.
Education Today hian survey form 1300 a endik hnuah LFHSS hi Top Day-cum-Boarding School – Parameter Wise for ‘Co-curricular Education’ huangchhungah India rama ṭha berah a puang a ni.
School director Ani Yepthomi chuan annual India School Merit Awards function, December 8-a neihah lawmman hi a la.
LFHSS hian working days 220 chhungin activity 170 vel zet an buatsaih hman a, heng an activity buatsaih te hi classroom pawn lama an buatsaih te a ni hlawm.
Education India hian ramchhunga school ṭha 200-ah zirchianna hi neiin academic reputation, individual attention, infrastructure provision, innovative leadership management quality, co-curricular activities leh value education hmang te in school hrang hrang te hi a enfiah a ni.