Manipur-ah Sava vang tak kum 92 hnuah hmu leh

Manipur Bishnupur district-a wildlife war­den RK Birjit Singh chuan sava chi khat, an mang mai hlauhawm tawh(endangered bird), yellow-breasted bunting (Emberiza aureola) chu kum 92 zet hnua a hmasa ber atan thla hmasa khan hmuh a nih thu a sawi.

Yellow-breasted bunting hi hmarchhak vela hmuh a nih hnuhnun ber chu 1926 kha niin, hei hi British ornithologist Stuart Baker-a record aṭanga a lan dan a ni. Tualchhung mite chuan Lam-Sendrang (wild sparrow) tiin an ko nia sawi a ni a, Bishnupur district-a Thinungei Bird Sanctuary-ah November 28 khan hmuh a nih thu an tarlang.

Indian Bird Con­servation Network State coordinator ni bawk RK Birjit Singh chuan nikum November thla khan Thongjaorok lui bul velah hmuh a nih thu report awm mah se a thlalak a awm loh avangin finfiahna a awm lo tih a sawi.

Birdlife International and International Union for Conservation of Nature Redlist chuan 2004 khan yellow-breasted bunting-te hi endangered species-ah a puang a, hmuh tur an vang tawh hle nia tarlan ni bawkin Maharashtra-ah pawh 2014 khan hmuh a ni a, hemi hnu hian an hmu leh tawh lo niin an sawi.