NRC claims & objection siam hun chhung pawhsei beisei

Assam sorkar chuan Thawhṭanni khan an state in a kalpui mek National Register of Citizens (NRC) -a claims & objections siam hun chhung chu thla khat chhung atan pawhsei leh theih nise an duh thu an sawi.

Additional Solicitor General Tushar Mehta chuan Chief Justice Ranjan Gogoi kaihhruai bench hnenah claims & objections siam hun pawhsei leh hi Assam sorkar chuan a dil tih a sawi.

NRC hi Supreme Court enpuina hnuaia neih niin Court chuan November 1 khan NRC-a tel lo mi nuai 40 chuang te chu finfiahna document paih tak panga te hman a phalsak leh a ni. Court hian December 15 thleng insawifiahna hun hi a hawnsak a, hemi a nih avang hian state sorkar chuan pawhsei sak leh tur hian an dil a ni.

Report ṭhenkhat chuan nimin thleng khan claims & objections siam hi mi nuai 10 vel chiah an la nih thu an sawi a, hei vang hian hun tam zawk an la mamawh dawn niin an sawi.