Nagaland-ah Class 8 chinah Hindi compulsory subject-ah dah dawn

Union home minister Amit Shah-a'n hmarchhak state pariatten school-ah Class X thleng Hindi chu compulsory subject-a dah amreti tih a sawi chu hmarchhak state hrang hrangah sawiselna a tam hle.Nagaland School Education pawhin Class 8 thleng chauh compulsory subject-ah dah a ni dawn tih a sawi.

Principal director Shanavas C chuan thuchhuah siamin, "Nagaland state chuan Class 8 thleng ṭawng chi thum zirna chu a kalpui zel dawn a, Hindi pawh Class 8 thleng compulsory subject-ah dah a ni ang. Class IX leh X ah zirlaite chuan Hindi emaw, Modern Indian Language (Ao/Bengali/Lotha/Sumi/Tenyidie) emaw Alternative English emaw chu Second Language-ah an thlang thei ang," a ti.

Shanavas chuan National Education Policy (NEP) 2020 chuan secondary thleng ṭawng chi thum zir turin a tarlang a, mahse state tina ṭawng zir tur bik erawh a tilang lo a ni, a ti. Hei vang hian NEP 2020 angin, zirlaite chuan state sorkar emaw, anmahni emawin an thlan ṭawngte chu an zir dawn a ni, tiin a sawi. NEP 2020-ah hian Secondary state-ah Hindi chu compulsory-a dah tur tih engmah sawilan a ni lo a ti bawk.

Nagaland-a political party hrang hrangte chuan Class 10 thleng Hindi subject compulsory-a dah tura tih chu an duh lo a, Rising People's Party (RPP) chuan state leh ram pum anga Hindi inzirluih tir tumna chu a tlem zawk chunga a tam zawk inlulin tumna a ni tiin, hetiang policy hi an theih tawpin an dodal zel dawn tih an sawi.

Naga People's Front (NPF) president Dr Shurhozelie Liezietsu pawhin mipuite Hindu thiam tir tuma hmalakna engmah awm hmasa loin, he ṭawng hre thiam lote zir luih tir an nih chuan inlakhranna nasa tak siamin, hei hi rampum tan pawh a ṭha dawn lo tih a sawi bawk. "Kum 40 hnuah pawh central-a sorkarna changtu apiangte Hindi tihmasawnna kawngah Nagaland-ah hma engmah an lak tak tak loh avangin kan dinhmun a la ngai reng a ni. Hindi hi kan duh lo a ni lo. Mahse tunah hian English thlakna atana Hindu hman hi thil theih a ni lo. Hei hi thil awmdan dik tak a ni a,thlan tur dang a awm rih lo," a ti.