Assam : Healthcare infrastructure tihchangtlunna tur Rs vbc 3,800 pawm

Assam cabinet chuan state healthcare infrastructure tihchangtlunna turin Rs vbc 3,800 hu, ‘Assam Health System Strengthening Project’a pawm. He project hi Japan International Cooperation Agency (JICA) in a sponsor dawn a ni.

Chief minister Himanta Biswa Sarma kaihhruai cabinet meeting-ah hian state chhunga medical institution pathum siamna atan Rs vbc 530.41 pawm a ni bawk.

‘Assam Health System Strengthening Project’ hnuaiah hian Silchar, Tezpur, Jorhat, Barpeta, Diphu leh Lakhimpur-ah medical college-ahte super speciality wing siam a ni dawn a, hei bakah hian Silchar, Udalguri, Hojai, Hailakandi, Darrang, Dima Hasao district hospital-te chu thuam ṭhat an ni bawk ang.

State cabinet chuan training-cum-monitoring pual bikin adiministrative centre, Swasthya Bhwan sak a remti bawk a, hospital tan hospital management information system siam an rel bawk.

Kokrajhar, Tinsukia leh Nagaon-a medical college sakna tur senso pawh ennawnin, thil man sang zel aṭangin estimate,Rs vbc 1,191.59 chu Rs vbc 1,722-ah a ti sang.