Amit Shah chungchanga ṭawngkam mawi lo hmanga puh Manipur Congress thupuangtu man a ni

Manipur police-te chuan local television network-a talk show neih laia union home minister Amit Shah chungchanga ṭawngkam mawi lo tak hmanga puh, Manipur Pradesh Congress Committee (MPCC) thupuangtu, S Samachoron Singh chu Thawhlehni khan an man.

Manipur unit BJP Yuva Morcha president, M Barish Sharma chuan Thawhṭanni khan Imphal police station-ah Congress hruaitu lakah hian complaint a thehlut a, hemi hnu Thawhlehni khan police-te chuan Samachoron Singh hi Imphal-a a chenna inah an man a, City Police Station-ah an hlan a ni.

S Samachoron Singh hi lower court-a lawyer a ni a, April 9 khan local TV-ah Amit Shah-a'n hmarchhak state-ah Class 10 thleng Hindi ṭawng chu compulsory subject-ah dah a ni dawn tia a sawi chungchangah sawiho a ni. He hunah hian Samachoran hi panelist-ah a tel a ni.

Police-a complaint a thehluhah, BJP hruaitu Sharma chuan TV-a sawihona neih ṭum hian, Samachoran chuan mainland India chungchang chu ṭawngkam mawi lo tak takin a sawi a, mainland India-a Hindu-te pawh 'ramsa' tiin a sawi a, Amit Shah chungchang pawh mawi lo takin a sawi a ni, a ti. He a ṭawngkam hman hi hnam leh sakhua ang zawnga midang rilru tihnatna, mipuite rilruah sorkar huatna chawh thawh tumna a ni, a ti.

Manipur Congress chuan Amit Shah-a'n hmarchhakah Class X thleng Hindi zir ngei ngei tur nia a sawi chu na takin an sawisel a, Hindi ṭawng inzirtir luih tumna chu an dodal zel dawn tih an sawi. MPCC president Kisham Meghachandra chuan, "Eight schedule-a tel ṭawng hrang kan nei sa tawh a ni," tiin a sawi. Hindi ṭawng zir luih tir chuan Manipur hnam zia leh tihdan phung thlengin a tibuai pha dawn tih a sawi.

Hindi ṭawng zir ngei ngei tura tih hi hmarchhaka eptu party hrang hrangte chuan an sawisel a, zirlai pawlte pawhin an duh lo bawk. Hemi chungchanga Amit Shah thusawi hi an demna thute pawh a chhuah a ni.