Assam-Arunachal inkarah India siam aircraft thlawh tir

'Make in India' hmalakna hnuaia India rama aircraft siamchhuah hmasa ber, Dornier Do-228 aircraft chu a hmasa ber atan Dibrugarh, Assam leh Pasighat, Arunachal Pradesh inkarah Thawhlehni khan thlawh tir a ni.

Union civil aviation minister Jyotiraditya M Scindia chuan seat 17 awmna, Dornier Do-228 aircraft hi a vailiam a, he hunah hian union minister Kiren Rijiju, Arunachal Pradesh chief minister Pema Khandu leh civil aviation ministry, Airports Authority of India (AAL) leh Hindustan Aeronautics Ltd (HAL) official-te an tel.

Dornier aircraft hi Hindustan Aeronautics Limited (HAL) siam a ni a, public sector Alliance Air nen February thla khan aircraft pahnih hman tir tur hian inremna an ziak a, April 7 khan airline hian aircraft hi an dawng a ni. Alliance Air chu India rama commercial airline zinga passenger service atana India siam aircraft thlawh tir hmasa ber a ni ta bawk.

Thawhlehni vek khan union minister M Scindia hian flight training organisation (FTO), M/s Red Bird Flight Training Academy Pvt Ltd-in hmarchhak-a academy a siam hmasa ber, North Lakhimpur-a Lilabari Airport ami chu a hawng bawk a, Assam chief minister Himanta Biswa Sarma pawhin a telpui a ni. Scindia leh Sarma-te hian pilot training academy-a zirlai leh trainer-te nen inkawmna hun an hmang zui nghal a ni.