Thlipui tlehin Meghalaya-ah in 1,000 chuang len chhia

Meghalaya-a Ri Bhoi district-ah nimin khan thlipui tleh vangin chenna in 1,000 chuang a chhia.

Thlipui tleh hi district chhunga thingtlang khaw 47 velin an tuar a, thingkungte pawh a len tlu nasa hle. Thli tleh vanga chhiatna tam zawk thlenna hi Lumnongring Dewlieh, Umsning leh Umroi khuate an ni.

Chenna in tam tak bakah sorkar hmun pawimawh, Block Development Officer (BDO) office, school, public works department office leh veterinary office-te chu thliin a len chhiat zingah hian an tel.

Ri Bhoi district deputy commissioner Arpit Upadhyaya chuan, thliin a len chhiat zinga chenna in tam zawk chu thawm ṭhat theih a nih thu a sawi a, hetihlai hian in 86 vel erawh chu luah zui tlak loa a chhiat vek thu a sawi. Umeit khuaah mi pathumin hliam an tuar tih a sawi bawk.

Sorkar chuan thli tleh vanga chhiatna thlenna hmunah hian chhanchhuah leh chhawmdawl hna thawk turin disaster management team-te tirh nghal an nih thu a sawi.

Assam-ah thlipui tleh vangin mi 3 an thi
Assam-ah pawh nimin khan Barpeta district-ah thlipui tlehin chhiatna a thlenah mi pathum an thi a, mi eng emaw zatin hliam an tuar.

Barpeta district-a khaw 15-ten thlipui hi tuarin, chenna in 130 chuang a chhe bawk niin district official chuan a sawi. Hliam tuarte hi damdawi-inah dah luh nghal an ni.

Thlipui tleh hian Darrang district-a Dhalpur area aṭanga sorkarin a chhuahtir te awmna lailawk siam pawh a len chhe tel bawk.