Assam-ah Burma kuhva Rs vbc 1.5 hu man

Assam-a Hailakandi district-ah Nilaini khan police-ten Burma kuhva, Rs vaibelchhe 1.5 chuang hu an man.

Police-te chuan Mizoram aṭanga Cachar district panpui tur, Burma kuhva bag 560 chuang hi rel pindan pahnihah an man tih sawiin, railway police-te kutah an hlan nghal thu Ramnathpur police station officer-in-charge Nabojit Lahon chuan a sawi.

Hailakandi superintendent of police Gaurak Uphadhyay chuan rel station hi tlawh nghalin, Hailakandi district/Barak Valley kaltlanga kuhva rah tawlhluh a nih dan chu chiang zawka chhui a nih tur thu a sawi. Police-te chuan kuhva an man hi Mizoram aṭanga West Bengal lama thawn tur nia an hriat thu sawiin, dan kalha kuhva tawlhruknaa inhnamhnawihte hi ngawrh taka chhui mek an nih thu an sawi bawk.

Barak Valley-ah hian tun hnaiah Burma kuhva leh a tawlhtu mi eng emaw zat man an ni tawh a, January 28 khan Hailakandi district-a Chandrapur godown-ah Rs vbc 1.5 hu an lo man tawh bawk a ni. January 5 khan Cachar district-a Khambarbazar-ah truck pathum-ah cheng vaibelchhe eng emaw zat hu kuhva leh a kengtu nia puh mi pasarih man a ni. January 3 khan Churaibari police watch post bulah truck pahnihah Rs vbc 1 chuang hu leh mi pali an man bawk a ni.

February 19 khan Barak Valley-ah Burma kuhva tawlhnaa inhnamhnawiha rinhlelh mi pahnih man an ni a, mafia leader nia hriat Didarul Haque (alisa Bablu) pawh January 7 khan Cachar district-a Brahmangram aṭangin man a ni tawh bawk.