Meghalaya-ah Covid-19 positive result tisual

Meghalaya-ah Covid-19 positive nia puan pakhat chu test nawn leh a nih hnuah hri a kai lo tih hriat chhuah a ni a, an state-a hri kai hmuh tawh zat pawh 44 aṭangin 43 ah a tlahniam a ni. 

Health minister Al Hek chuan kum 70 mi, Rhi Bhoi district mi chu severe acute respiratory infection (SARI) a neih avangin June 9 khan Shillong damdawiinah dah a ni tih a sawi. Damdawiina dah a nih hnuah RT-PCR (reverse transcription-polymerase chain reaction) test neihsak nghal niin, a result-ah Covid-19 positive a nih thu a sawi. Hemi hnu hian damlo hi khung hran nghal a ni, contact tracing pawh neih nghal a ni bawk. Mahse a lo khawih fuh tawh mi 43 an chhui chhuahte  zingah Covid-19 kai tumah an awm loh avangin doctor-te pawhin mak an ti hle a ni. Hei vang hian rapid test leh RT-PCR neih sak leh a ni a, a pahnih result hi a negative ve ve ta a ni. A positive nia lo sawi tawh chu tihsual palh niin Hek chuan a sawi. 

Health official-te chuan RT-PCR test dik theihna rate hi 99% niin, a dik theih lohna chance 1% chauh a ni tih an sawi.  Meghalaya mi pakhat pawh hi result dik lo awm thei tlemte zingah a tel ve a ni. He damlo hi hypertension leh diabetes a neih avangin damdawiinah enkawl chhunzawm a la ni a, a ngaihtuahawm lo nia sawi a ni. 

Meghalaya hi hmarchhak state zinga Covid-19 kai awm tlemna ber state a ni tawh. Hri kai hmuh tawh mi 43 zingah 28 chu enkawl dam an ni tawh a ni.