Tripura-ah hri kai enkawl mek 592 an awm

Tripura-ah coronavirus kai mi 20 hmuh belh an ni a, hri kai hmuh tawh hi mi 1,158 an awm tawh. Mahse a tam zawk chu enkawl dam an ni tawh a, enkawl mek hi mi 592 an la awm.

Ningani khan sample 1,250 test a ni a, positive hmuh chhuah zingah hian truck driver pakhat a tel a, midangte pawh zin chhuahna nei vek an ni.Hemi ni vek hian  hri kai enkawl zinga mi 58 chu an result a negative tawh avangin Covid Care Centre aṭangin chhuahtir an ni thung. 

Chief minister Biplab Kumar Deb chuan hri leng dona kawnga an state-a healthcare staff te inpekna leh hnathawh chu fakawm a tih thu sawiin, hri leng mek chu  an la hneh ngei dawn tih a sawi. 

Hri leng avanga ram danga tangkhangte pawh an la haw belh zel a, Ningani khan Bangladesh aṭangin mi 134 chu Tripura-ah Akhaura check-post kaltlangin an haw. May 28 khan Bangladesh aṭang vek hian mi 129 an lo haw tawh bawk a ni.